سعودی حکومت کا معیشت سے متعلق بڑا اعلان

سعودی ذرائع ابلاغ کے مطابق کورونا وائرس کی وبا سے متعلق سعودی وزیر خزانہ محمد الجدعان نے کہا ہے کہ دنیا بھر کو کوویڈ19کی جان لیوا وبا کا سامنا ہے جس کی وجہ سے بے پناہ معاشی مسائل پیدا ہو رہے ہیں تاہم سعودی عرب کی معیشت مستحکم ہے ہم اس وبا سے پیدا ہونے والے بحران سے بخوبی نمٹنے کی صلاحیت رکھتے ہیں

وزیر خزانہ نے عید الفطر کے موقع پر جاری بیان میں کہا کہ اس موقع پر ہم ہی نہیں بلکہ ساری دنیا کو اس وبائی مرض کا سامنا ہےان حالات میں دنیا بھر کو بے پناہ مشکلات کا سامنا ہے تاہم سعودی حکومت نے اس وبا کا سامنا انتہائی حوصلہ اورتدبر سے کیا ہے۔

انہوں نے کہا کہ سعودی حکومت کے نزدیک اولین ترجیح شہریوں اور غیر ملکی تارکین وطن کی سلامتی ہے جسے مدنظر رکھتے ہوئے لوگوں کی بنیادی ضروریات کو پورا کرنے کےلیے جامع حکمت عملی مرتب کی گئی۔

وزیر خزانہ نے مزید کہا کہ موجودہ حالات کے پیش نظر حکومت نے شہریوں اور مقیم غیر ملکیوں کی صحت کو ترجیح دینے کے ساتھ معاشی مسائل پر بھی بخوبی قابو پانے کے لیے مثالی اقدامات کیے اس سلسلے میں معاشی طور پر متاثر ہونے والوں کی ریلیف پیکج کا اعلان کیا گیا تاکہ انہیں ان مشکل حالات سے نکالا جاسکے۔