تونسہ میں شوہر کے سامنے خاتون سے اجتماعی زیادتی

ڈیرہ غازی خان کے علاقہ تونسہ شریف میں دو ملزمان نے گھر میں گھس کر شوہر کے سامنے خاتون کو زیادتی کا نشانہ بنایا۔

 پولیس نے مقدمہ درج کرکے ملزمان  کی تلاش شروع کردی جبکہ وزیراعلیٰ  پنجاب عثمان  بزدار نے واقعہ کا نوٹس لے لیا۔

ڈیرہ غازی خان کی تحصیل تونسہ  شریف کے نواحی گاؤں ریتڑہ کی بستی لاشاری  کے رہائشی ایک شخص نے تھانہ ریتڑہ میں مقدمہ درج کراتے ہوئے کہا کہ گزشتہ شب دو ملزمان فیاض احمد اور الہی بخش نے گھر کی دیوار پھلانگ کر میری اہلیہ کو پہلے تشدد کانشانہ بنایا اور پھر باری باری جنسی زیادتی کرنے کے بعد فرار ہوگئے۔

پولیس نے دونوں ملزمان کے خلاف مقدمہ درج کرکے متاثرہ خاتون کے میڈیکل ٹیسٹ سمیت ڈی این اے کے نمونے حاصل کر کے لیبارٹری بھجوادئیے۔

ترجمان پولیس کے مطابق واقعہ میں ملوث ملزمان کی گرفتاری کیلئے ٹیمیں تشکیل دیدی گئی ہیں اور ملزمان کو جلد از جلد گرفتار کرکے قانون کے کٹہرے میں  لایا جائے گا۔

واقعہ کے خلاف متاثرہ خاتون کے لواحقین نے احتجاج کیا اور وزیراعلیٰ پنجاب سردار عثمان بزدار سے انصاف کے حصول میں مدد کی اپیل کی۔ یاد رہے کہ عثمان بزدار کا تعلق تونسہ سے ہے اور وہ اسی حلقے سے پنجاب اسمبلی کے رکن منتخب ہوئے ہیں